Ubasute - Radio teatro

“Ubasute. É a palabra xaponesa para o abandono dunha vella”

Ubasute de Paula Carballeira é o primeiro achegamento ao teatro radiofónico da Radio Rochoteca. A peza trata do abandono, a culpa e os recordos que, xunto coa poesía, son capaces de achegarnos ás pantasmas dos nosos devanceiros. Foi escollida polo Equipo de Dinamización da Lingua Galega da EOI de Lugo nun curso no que estamos a traballar coa poesía e a música no proxecto de innovación da lingua galega “Música e poesía: movendo a lingua”, proxecto conxunto da EOI e o CMUS Xoán Montes. As voces son as de Carmen (Muller), Roberto (Home), Loida (Avoa) e Esther (acotacións), alumnado de diversas linguas da EOI. Na escolla da música que acompaña á peza teatral contamos co asesoramento da propia autora e, seguindo as súas suxestións, José R. Saborido, profesor e coordinador do EDLG do conservatorio de música, procurou as seguintes pezas: “Carallada” de Pablo del Valle, “Armenia” do álbum Pangea de Abraham Cupeiro, as Danzas rumanas nº 4 e nº 5 de Bartók interpretadas por Abraham Cupeiro e contidas no seu álbum Os Sons Esquecidos.

Grazas a todas as persoas que participastes neste podcast. A Noemí, Pilar e Carme por animar ao alumnado a participar nesta actividade. A Abraham Cupeiro e Pablo del Valle por permitirnos usar a súa música. E un moi especial agradecemento a Paula Carballeira polo seu asesoramento e facilidades para levar a cabo este traballo.

Concurso "Primavera poética" da EOI e o CMUS

 Vista a enorme calidade das ilustracións dos poemas no concurso “Primavera poética” convocado polos EDLG do CMUS e a EOI de Lugo no marco do proxecto “Música e Poesía: movendo a lingua”, resolvemos agasallar a dúas das persoas participantes en cadansúa categoría. Os traballos serán expostos nos nosos centros en breve.

Parabéns!

Semana das Letras Galegas 2025

Esta semana anunciamos a publicación dos novos podcasts do proxecto "Música e poesía: movendo a lingua".

Trátase das entrevistas ás poetas cuxos poemas foron musicados ou formaron parte das pílulas curativas.

Preme na imaxe para escoitar as entrevistas!

 

 

 

Semana das Letras Galegas 2025

Con motivo da celebración do vindeiro Día das Letras Galegas, esta semana faremos diversas publicacións dos traballos do Equipo de dinamización da lingua galega na EOI de Lugo.

Comezamos anunciando a exposición dos cartaces que nos envía como cada ano a Secretaría Xeral da Lingua e que se pode ver no primeiro andar da EOI.

Día das Letras Galegas - cartel exposición de Eoi Lugo EDLG

Tamén retomamos os traballos sobre similares tradicións que as nosas auxiliares de conversa procuraron na súa lingua materna. Podedes acceder a elas dende as ligazóns deste cartaz:

Cantareiras de Eoi Lugo EDLG

A tradición das cantareiras en francés

Victoria Bresca, a auxiliar de conversa de francés este curso, procurou información sobre a algunha tradición similar á das cantareiras en francés. Para iso falou con Brigitte Arnaudiés, unha "conteuse" que se achegou á nosa EOI. Aquí tedes a entrevista que lle fixo Vitoria:

La conteuse de Eoi Lugo EDLG

Vídeo do acto de clausura do proxecto "Música e poesía: movendo a lingua"

O luns 5 de maio vivimos un serán cheo de emocións no acto de clausura do proxecto de innovación “Música e poesía: movendo a lingua”, unha iniciativa conxunta do CMUS Xoán Montes e a EOI de Lugo, que contou tamén coa colaboración especial do Conservatorio Profesional de Danza.

A palabra poética, a música e a danza uníronse para celebrar a riqueza da nosa lingua e da nosa expresión artística. Estiveron con nós algunhas das poetas cuxos poemas foron musicados ou foron escollidos na nosa Botica da lingua para as pílulas curativas. Foron Marica Campo, Nieves Neira, Lucía Novas e Eva Teixeiro as que estiveron fisicamente, pero Pilar Pallarés estivo presente no seu emotivo poema que axudou a que non esqueceramos o sufrimento das xentes de Palestina. Grazas a todas!

E, por suposto, grazas ao público, polo apoio cálido e receptivo.

Oxalá que a música, a danza e a poesía —recitada tamén noutras linguas— sigan sendo pontes que nos acheguen, cada vez máis, á nosa lingua e á súa beleza viva. 

Aquí tedes o vídeo do acto de clausura: