Día de Rosalía - 2025

Este ano o Día de Rosalía foi un exemplo de traballo colaborativo. O Equipo de Dinamización da Lingua Galega do CMUS organizou un acto no que participamos os EDLG da EOI e do CDAN e que serviu para xuntar poesía, música e danza. E a todo iso puxémoslle flores e árbores. Repartimos caraveis de cores e marcapáxinas cos poemas de Rosalía que Esther, alumna da EOI, recitou mentres se facían improvisacións de música e danza. Tamén se plantou un castiñeiro no xardín do CMUS. Flores, árbores, lembranza do vínculo entre natureza e literatura tan presente na obra da nosa autora máis universal. 

Velaquí unha mostra do acto:

 

A publifotos do CMUS tamén circulou polos tres centros e puidemos retratarnos xunto a Rosalía.

21 de febreiro. Día da Lingua Materna

Co gallo do Día da Lingua Materna, as auxiliares de conversa da EOI de Lugo procuraron tradicións nos seus países que tiveran algunha conexión coas CANTAREIRAS por transmisión oral, tradicións femininas e loita polos dereitos das persoas. 

Escaneade o QR o pinchade na ligazón para coñecer aspectos das linguas maternas doutros países. AQUÍ podedes ver mellor a imaxe.

As Pílulas curativas saen dos nosos centros!

 As Pílulas curativas da nosa Botica da Lingua xa se atopan en varios establecementos de Lugo, Sarria e Vilalba. Xa están a facer efecto na poboación! Que boas son a música e a poesía!

O EDLG en InnovArt25

 O 6 de febreiro estivemos representando aos EDLG da EOI e do CMUS no InnovArt25 na Cidade da Cultura de Santiago de Compostela.

 Compartimos algunhas das nosas actividades co público asistente, maioriotariamente escolares de educación primaria e secundaria, mais tamén amosaron interés persoal médico do CHUS e docentes doutros centros: O noso Tendal da Poesía, as nosas Pílulas curativas e a fantástica actuación conxunta do Conservatorio de Danza, o Conservatorio de Música e a EOI de Lugo.

2025 Ano Castelao

Neste mes de xaneiro lembramos que este ano 2025 foi declarado Ano Castelao, ao cumprirse 75 anos do pasamento de Alfonso Daniel Rodríguez Castelao.

Logo, o 30 de xaneiro, Día de Castelao celebramos a súa figura cunha exposición de libros na biblioteca da EOI e con exposicións simultáneas na EOI e no CMUS.

Na EOI acollemos a exposición "De 'Sempre en Galiza' ao Consello de Galiza (1934-1944)" compartida con nós pola Cátedra Castelao da Universidade de Santiago de Compostela e no CMUS fixeron unha exposición sobre Castelao e a súa relación coa música. Aínda podedes visitalas!

 

Exposición De 'Sempre en Galiza' ao Consello de Galiza (1934-1944) na EOI de Lugo

Exposición sobre Castelao e a súa relación coa música no CMUS Xoán Montes

Felicitación de Nadal

 Nestes meses a música e a poesía galegas fluíron entre o CMUS Xoán Montes e a EOI de Lugo. Os dous centros penduramos tendais nos nosos corredores, repartimos postais e mesmo montamos unha botica con pílulas que todo o curan.

Agora descansaremos un par de semanas para voltar o vindeiro ano con novas actividades en que a nosa lingua, a nosa música e a nosa cultura seguirán a ser as protagonistas.

 

Grazas a @carlosnunez_oficial por deixarnos empregar o audio do Vilancico para o Nadal de 1829, panxoliña composta no ano do título polo Mestre Pacheco, mestre de capela da catedral de Mondoñedo.

Bo NaGal!!

 

#PROXECTACMUSEOILUGO 

#edlgcmusxoanmontes 

#eoidelugo
#cmusxoanmonteslugo 

#proxecta 

#edlg

#boticadalingua

#pilulascurativas

Música e poesía. As pílulas curativas da nosa Botica da Lingua

 Durante o mes de novembro (mes da ciencia en galego) os EDLG do CMUS e da EOI de Lugo estivemos argallando coa musicoterapia e a biblioterapia, e na nosa “Botica da lingua” preparamos unhas pílulas curativas a base de poesía e música. Agora xa temos pílulas para o repouso, para ter un día feliz, para sacudir a tristura, para quentar o corazón e para cando se sinta a lingua atrofiada.

Esta semana distribuiremos pílulas no CMUS e na EOI. Desexamos que os efectos do tratamento sexan os desexados. Contádenos nos comentarios!

As pílulas tamén chegaron á sección de Sarria da EOI

E o alumnado xa ten a súa pílula.